నాగబాబు ప్లాస్మాదానం చేస్తుండగా సర్ ప్రైజ్ చేసిన చిరంజీవి

మెగాబద్రర్ నాగబాబు ఇవాళ పుట్టినరోజు జరుపుకుంటున్నారు. ఈ సందర్భంగా ఆయన చిరంజీవి చారిటబుల్ ట్రస్టు కార్యాలయంలో జన్మదిన వేడుకలు జరుపుకున్నారు. ఈ వేడుకలకు మెగాస్టార్ చిరంజీవి ఎలాంటి సమాచారం లేకుండా వచ్చేసి తన తమ్ముడ్ని సర్ ప్రైజ్ చేశారు. ఈ సందర్భంగా కేక్ కట్ చేసిన నాగబాబు తన అన్నయ్య సమక్షంలో పుట్టినరోజు జరుపుకుని మురిసిపోయారు. ఈ కార్యక్రమంలో చిరంజీవి చారిటబుల్ ట్రస్టు సిబ్బంది కూడా పాల్గొన్నారు.

కాగా, నాగబాబు తన పుట్టినరోజును పురస్కరించుకుని ప్లాస్మాదానం చేశారు. దీనిపై ఆయన స్పందిస్తూ, కరోనా నుంచి కోలుకున్న తాను రెండోసారి ప్లాస్మా దానం చేస్తుండగా అన్నయ్య చిరంజీవి సడెన్ గా వచ్చారని వెల్లడించారు. అయితే, తన అన్నయ్య వస్తున్నట్టు తనతో పాటు ఎవరికీ తెలియదని, తాను వస్తున్నట్టు ముందుగా సమాచారం ఇవ్వకుండానే వచ్చేసి తనను ఎంతో సంతోషానికి గురిచేశాడని వెల్లడించారు.

తానెంతో ఇష్టపడే తన సోదరుడు తన జీవితానికి మార్గదర్శిగా ఉండడం ఎంతో హర్షణీయం అని తెలిపారు. మహాసముద్రం అంతటి ఆయన ప్రయత్నాల్లో తాను ఓ చిన్న బిందువుగా ఉండడం పట్ల గర్విస్తున్నానని వెల్లడించారు.
Tags: Chiranjeevi, Nagababu, Surprise Visit, Plasma Donation, CCT

 

ఆన్‌లైన్ గ్యాంబ్లింగ్, బెట్టింగ్ యాప్‌లు నిషేధించండి: కేంద్రమంత్రికి సీఎం జగన్ లేఖ

ఆన్‌లైన్ గ్యాంబ్లింగ్, బెట్టింగ్ వెబ్‌సైట్లు, యాప్‌లను నిషేధించాలని కోరుతూ ఏపీ ముఖ్యమంత్రి వైఎస్ జగన్‌మోహన్‌రెడ్డి కేంద్ర మంత్రి రవిశంకర్ ప్రసాద్‌కు లేఖ రాశారు. యువత వీటికి బానిసలుగా మారుతున్నారని, ఆర్థికంగా చితికిపోతున్నారని జగన్ ఆవేదన వ్యక్తం చేశారు.

వీటి బారినపడి డబ్బులు నష్టపోయిన వ్యక్తులు ఆత్మహత్యలకు కూడా పాల్పడుతున్నట్టు పేర్కొన్నారు. బెట్టింగ్ యాప్‌లు, గ్యాంబ్లింగ్‌పై ఉక్కుపాదం మోపేందుకు 1974 ఏపీ గేమింగ్ చట్టంలో సవరణలు కూడా తీసుకొచ్చినట్టు ఈ సందర్భంగా మంత్రి దృష్టికి తీసుకెళ్లారు. రాష్ట్రంలో మొత్తం 132 వెబ్‌సైట్లు గ్యాంబ్లింగ్, బెట్టింగుకు కారణమవుతున్నాయని, వాటిని నిషేధించాలని కోరుతూ వాటి వివరాలను ముఖ్యమంత్రి తన లేఖకు జతచేశారు.
Tags: Jagan, Ravishankar prasad, Letter Online gambling apps